Ibiheruka Uko amagambo 7 Yesu yavugiye ku musaraba akurikirana n’amasomo akubiyemo  |  Inyungu zo gutitiriza Imana  |  Ibintu 4 bituma Imana iba ikuretse  | 
Home page » Ibibazo n’ibisubizo » Namenya nte ko navutse ubwa kabiri?
Namenya nte ko navutse ubwa kabiri?

Ubusanzwe umuntu wese uriho ni uko yabanje kuvuka hanyuma akabaho. Kuvuka kwe bwa mbere rero ni igihe ava mu nda y’umubyeyi kubw’umubiri, yari avutse bwa mbere. Uyu muntu Bibiliya imusaba kongera kuvuka ubwa kabiri agahinduka icyaremwe gishya ariko noneho atabiheshejwe no gusubira mu nda ya nyina, ahubwo abiheshejwe no kwizera Umwami Yesu, agahinduka umwana w’Imana, hirya yo kuba umwana wa runaka na nyirakanaka.

Iki ni kimwe mu bibazo abantu bakunze kwibaza, yewe n’igihe umugabo witwa Nikodemu ahura na Yesu, Yesu yamusabye ko agomba kuvuka ubwa kabiri. Yohana 3:7 ‘’ Witangazwa n’uko nkubwiye yuko bibakwiriye kubyarwa ubwa kabiri.’’

Mu yandi magambo inzira imwe yakubashisha kumenya Imana ni uko ubanza kwemera guhinduka icyaremwe gishya, ukavuka ubwa kabiri ubiheshejwe no kwizera Umwami Yesu. Ni ukuvuka mu buryo bw’Umwuka. Yesu yaravuze ngo ‘’Ikibyarwa n’umubiri na cyo ni umubiri, n’ikibyarwa n’Umwuka na cyo ni umwuka.’’ Yohana 3:6

Nkwibutse ko Bibiliya ivuga ko Imana ari Umwuka, none waba umwana w’umwuka waravutse ku mubiri gusa? ntibyashoboka. Uku kubyarwa ubwa kabiri ni umurimo w’Umwuka wera.

Ngaho ibaze uburyo bw’igitangaza Imana yakubumbiyemo ukaba urusoro mu nda ya mama wawe, Yeremiya 1:5. Ubundi buryo rero bw’igitangaza umuntu avukamo mu buryo bw’Umwuka nibwo kuvuka ubwa kabiri, aho umuntu ahinduka umwana w’Imana, ikamubera umubyeyi. Guhinduka biguhesha imbabazi z’ibyaha byose wakoze. Bizana ubusabane hagati yawe n’Imana, kandi rwose umuntu ashobora kumenya ko yakiriye iyi mpano y’agakiza ihesha ubugingo buhoraho bubonerwa muri Kristo Yesu.

Yohana yaravuze ngo ‘’ Ibyo ndabibandikiye mwebwe abizeye izina ry’Umwana w’Imana, kugira ngo mumenye yuko mufite ubugingo buhoraho.’’ 1 Yohana 5:13 Umukristo ni umuntu wizera Yesu nk’Umwami n’Umukiza, kandi uwahindutse gutya ashobora kubimenya ko agakiza ke hariho kandi ko afite gakondo mu bwami bw’ijuru.

Kumenya ko wavutse ubwa kabiri wabimenya gute? Ubundi se ubwirwa n’iki ko uvuka aho uvuka? Nkeka ko impamvu yatumye wemera ko uvuka aho uvuka ni uko uhaba, uhagusanze wese amenya ko uri umwana wo muri urwo rugo. Ikindi ni uko usa n’ababyeyi, ibi bituma n’iyo utahiriwe ariko abazi ababyeyi bawe muhura bakavuga bati ‘’uyu mwana ni uwa runaka.’’ Imico yawe, uko ubayeho, ibyo uvuga, mbese hari ibintu byinshi bifitanye isano n’uko usanzwe ubayeho bishimangira uwo uri we, aho uvuka n’umuryango ukomokamo. Hari ikindi, iyo uvuka mu muryango uba wumva uwufitemo gakondo ( ibyo twitaga umunani), nubwo wajya gushaka ubuzima ahandi ukajya wumva nibyanga uzagaruka ugatura aho Papa wawe yakugeneye.

Tutiriwe tujya muri byinshi dusobanura, ubu ntiwahita umenya niba waravutse ubwa kabiri? Uretse kubyiyumvamo wumva ufite umugabane ku masezerano y’abandi bana baba mu rugo? Ni iki wumva uhuriyeho n’uwakubyaye? Bibiliya iravuga ngo twigane Imana nk’abana bakundwa. Abefeso 5:1 Ntabwo umukozi ukora iwanyu nubwo ari we ukora imirimo myinshi byigeze bimuhesha kwandikwa mu ndangamuntu y’ababyeyi bawe, oya. Burya ntabwo duheshwa agakiza n’uko twakoze imirimo kuko siyo idukiza ibyaha byacu ngo iduhindure abana b’Imana.

Nta nubwo kuba umukozi wo mu rugo yakubahiriza amategeko yo murugo byamuhindura umwana w’Imana. Kuhavuka nicyo gikomeye, Bibiliya iravuga ngo ‘’Abiringira imirimo itegetswe n’amategeko bose ni ibivume, kuko byanditswe ngo “Havumwe umuntu wese udahirimbanira ibyanditswe mu gitabo cy’amategeko byose ngo abikore.” Abagalatiya 3:10 Ntawe ubyarwa ubwa kabiri kuko yishingikirije ku mategeko cyangwa imirimo. Igituma tubyarwa ubwa kabiri ni ukwizera umurimo Yesu yakoreye ku musaraba, ukemera igiciro yakwishyuriye, agapfa mu mwanya wawe.

Ngiyo inzira yo gukizwa ukakira imbabazi, ukaba uvutse ubwa kabiri ubiheshejwe no kwizera Umwami Yesu, ugahindura ubuzima ukaba icyaremwe gishya, ukabaho ubuzima bw’abana b’Imana. Nyuma y’iki gihe utangira kubaho kubwa Kristo, ntuba ukiri wowe kubwa kavukire, ahubwo ukubonye akurebera mu isura y’ababyeyi bawe ( Imana), ni Kristo muri wowe kubwo guhinduka. Ntuba ukiri imbata y’ibyaha ahubwo uba iya Kristo kuko umugandukira muri byose.

Iyo uvutse ubwa kabiri, Umwuka wera araza akaba muri wowe. Niba aba muri wowe agushoboza kwera imbuto z’uwo Mwuka. Uwavuga ko yabyawe ubwa kabiri akibera mu buzima bw’ibyaha yaba abeshye. Uwabyawe ubwa kabiri ntiyishimira gukora ibyaha ahubwo yishimira kunezeza Kristo.

Nshuti ukurikije ubusobanuro, ingero twifashishije Wabasha gusobanukirwa niba warabyawe ubwa kabiri, ukurikije ibiranga uwabyawe ubwa kabiri, uko ubayeho byaguhesha gusobanukirwa. Niba utaravuka ubwa kabiri usabwa kwihana ibyaha ukabwira Imana ko utifuza kongera kwica amategeko yayo, ukizera ko Kristo yagupfiriye, akakubera impongano y’ibyaha byawe ku musaraba. Noneho ushobora kumwakira nk’Umukiza wawe, ukamwizera akaguhindura umwana w’Imana.

‘’ Icyakora abamwemeye bose bakizera izina rye, yabahaye ubushobozi bwo kuba abana b’Imana.’’ Yohana 1:12

Haba hari icyemezo ufashe nyuma y'ubu butumwa

Ntagitekerezo kiratangwa kuri iy'inkuru

TANGA IGITEKEREZO CYAWE


  •  

Izindi Nkuru
 
Kwamamaza
Kwamamaza
Find us on
Kwamamaza