Akenshi mu byanditswe, ijambo umutima ryakoreshejwe mu mwanya w’umwuka kandi impamvu yabyo irumvikana. Nk’ uko umutima ari wo zingiro ry’imikorere y’umubiri w’umuntu, ni nako umwuka ari wo zingiro rigenga imibereho y’umuntu. Mu Migani 4:23 haragira hati “Rinda umutima wawe kuruta ibindi byose birindwa, kuko ari ho ubuzima butangirira”(MSG). Ibintu byose bijyanye n’ubuzima bwawe byose mu by’ukuri bitangirira mu mwuka wawe. Gutsinda cyangwa gutsindwa, ubutunzi cyangwa ubukene, ubudashyikirwa cyangwa kugawa bitangirira mu mwuka w’umuntu. Ubwenge bwawe ni bwo rembo ry’umutima n’umwuka wawe. Iyo niyo mpamvu amagambo n’ibitekerezo wemerera kunyura mu bwenge bwawe atayunguruye abikwa mu mwuka wawe. Iyo niyo mpamvu ugomba kuyungurura ibintu byose binyura mu bwenge bwawe bigana mu mwuka wawe. Buri munsi twumva amagambo, tukabona ibintu kandi tukakira amakuru aturutse impande zose meza cyangwa mabi. Kubera iyo mpamvu, ukwiriye gushyiraho uburinzi ku mutima wawe kandi ntiwemerere umwuka wawe kwakira no kwita ku makuru mabi. Ntukigere na rimwe wemerera umutima wawe gutinda ku bintu utega amatwi, wumva cyangwa ubona bitandukanye n’Ijambo ry’Imana. Ijambo ry’Igiheburayo ryahiduwe ngo “rinda” mu Migani 4:23 ritanga ishusho y’uburinzi buzengurutse ikintu gifite agaciro. Dushobora no kugenekereza icyo cyanditswe dutya “Shyira uburinzi ku mutima wawe kuko ugira ingaruka ku bintu byose ukora.” Dutanze urugero, niba wumvise amakuru ko hariho ibibazo by’ubukungu; ugusubira inyumba kukaba kuganje, kandi ibintu bikaba bikomeye impande zose; ntugahangayike kuko utari uw’iyi si. Wange gutekereza kuri ayo makuru mabi; ntuyatindeho. Wange ko ayobora ubuzima bwawe cyangwa ko ategeka ibyo ubuzima bwawe bunyuramo. Ahubwo ukwiriye kugira uti “Oya, Ibyo si ibyanjye. Nkorera mu rwego rw’ubutunzi bwinshi kuko ndi umuragwa w’Imana n’umuraganwa na Kristo. Sinzigera nkena, mbura amafaranga cyangwa ncishwa bugufi.” Niba wemereye ibitekerezo bibi kwinjira mu mutima wawe, bizakuzanira ubwoba muri wowe. Kubera iyo mpamvu rero kora ibishoboka byose ngo urinde cyane umutima wawe. Wakire gusa ibitekerezo byo gutera imbere, intsinzi, ubuzima buzira umuze, ubutunzi, ibyishimo no kunyurwa bituruka mu Ijambo ry’Imana.
“Rinda umutima wawe kuruta ibindi byose birindwa, kuko ari ho iby’ubugingo bikomokaho”(Imigani 4:23).
Isengesho Data Mwiza, Ndagushimira ku bw’Ijambo ryawe rimpa amakuru meza yo gutekerezaho; Ijambo ryawe rihora rihabwa ikaze mu mutima wanjye, rikagira umumaro muri jye, ritanga umusaruro w’ibyo rivuga mu Izina rya Yesu, Amen.
Gucengera Ijambo
Abafilipi 4:8
